بنت جميلة ...اسمها آلاء ...تبصلها من اليمين من الشمال ...تلاقي براءة ...تلاقي جمال مع انها ما بتحطش نقطة اي شادو واحدة في عينها ...اي شادو من بتاع اوريفليم الي خارب ميزانية بنات كتير من مصر .ولا اي ماركة تانية رخيصة برضه ماهي جميلة جمال رباني...لبسها محترم شيك نضيف ...متناسق ..رخيص ساعات وساعات غالي ...آلاء ...تبتسم كده ...بكسوف لما تسمع كلمة حلوة...وضحكتها تجلجل وسط المجموعة لما يزغزغوها من الضحك ......آلاء مسلمة ...بتقرا قرآن على قدها ...آلاء ساعات تسمع ناس بتتخانق وتقولك وهابي والي يقولك شيعي والي يقولك سني وال يقولك معتزلة والي يقولك مرجئة ويتخانقوا ويمسكوا في خناق بعض آلاء مش عارفة الخلق دول بيتكلموا كده ليه ...هيا نفسها تتلخبط ساعات هوا مين عمل ايه ...آلاء ..تسأل واحد من الي بيتخانقوا طب هوا انت تعرف هوا يعني ايه وهابي طب هيا الكلمة جت منين ...طب اصلها ايه طب هما الجماعة الوهابية دي اساسا جت ازاي ...طب ظروف الناس في الوقت ده كانت عاملة ايه ...طب هيا الوهابية دي كان لها علاقة بالسياسة بلد ...طب ليها مصلحة عامة او اقتصادية ...قوم ايه الراجل او البنت الي محموء قوي وعمال يشتم ويتخانق مع غيره يرد انصاف ردود وهوا لاعارف اساسا مين عبد الوهاب ومين عبد الحليم حافظ ....تيجي تساله عن الشيعة يقولها ( ثكلتهم امهاتهم يا روح ماما من جوة) ...آلاء تسكت وهيا متلخبطة....اتخنقت لقت الناس دول واحد منهم بيسجر (اي يمسك بالسيجارة ) ويطلع دخان من مناخيره بكل ثقة وهوا بيكلم كانه مؤرخ تاريخي ومفكر فنى عمره كله في علم التاريخ ....واخونا بينفخ الدخان وهيص شعبها الرئوية بسم قاتل وعمال يقول حرية وهوا مش وخد باله انه مش من حقة يقتل آلاء بدخانه ....آلاء ما عندهاش اعتراض انه ينفخ بس في اوضة بعيد عنها ...ياااه دي تشيله فوق راسها لانه احترمها وعمالها قيمة بدون ما يجيبلها سرطان في رئيتها ....هوا بيسرطن نفسه ...هوا حر ...مش مشكلتها....
آلاء....لقت من الناس دول ...بنت زيها قمورة ...اسمها مروة...لابسة سليم ليج ...ولابسة طرحة ...وعمالة هيء وميء وكفك يا حودة وبالحضن يا حودة ..واهل الكتاب و السنّة ومش عارفة مين الي بيقولوا عليه ده الي مات من زمان ده اسمه ايه آه آه افتكرت الحسن البصري يا حودة خنقوا اهالينا... والبسوا وما تلبسوش وبلاش ضحك وبلاش مسخرة وضرب كفوف وبلاش احضان وبلاش دلع في التليفون وغناء الكروان وآلاء ساكتة بس قاعدة وسط المجموعة ماهي برضة معاهم بتسعى على رزقها ....البنت الامورة بصت ل آلاء وجابتها من أول الطرحة لغاية الشراب وقعدت تقولها هيا( الموزّة ) قاعدة ساكتة ليه (تقصد آلاء بكلامها) ...ولا هيا ساكتة عشانها مش عاجبها اني اوبن مايندد (منفتحة) ...وبكلم حودة ولا عشان انا لابسة شراب فيليه وهيا لابسة شراب محجبات من الي يجيب دوالي في سمانة الرجل ...مش عاجبك الكلام ولا ايه ياست لولو ...ولا عشان انتي لابسة طويل وخانقة سمانة رجلك بشراب محجبات ...خلااااص عايزة بنات مصر كلها تعاني من دوالي هوا الواحد هيلاقيها من ايه ولا ايه يا ست الحجة ...مش كفاية السرطان ...مش كفاية ...التهاب اكباد اهالينا يا كبدي ياني يامّة...مروة ...تدي ضهرها ل آلاء الي يا عيني ما فتحتش بقها ولا اكلمت عن سنة ولا حسن بصري ولا شتمت في الشراب الفيليه ...مروة عشان تغيظ آلاء انجشت في حودة ( يعني شبكت دراعها في دراع حودة عشان جيتله دوخة من منظر شراب آلاء ) ...حودة الي لا فارقة معاه لا سنة ولا حسن ولا يعرف تمن شراب الفيليه بكام ....ما صدق ...والتستيتيرون عنده علي ....وقال لنفسه ...يا سلام يا واد يا حودة ...ربنا برضه كريم ....(لاحظ الايمان) الحكومة خانقة أهلي ومغلية الاسعار والشقق معدية نص ارنب ...والواحد كان عايز يتجوز ...بس يا باشا جواز ايه وست تخنق اهلي وعيال ومدارس وكتب وكراريس وكيلو الطماطم بكام...
البت مروة دي غبائها ولسانها الطويل وتفاهتها بتنفع برضه ...واهو الواحد يطري القاعدة ...يلا خلينا نشوف حالنا وعواطفنا ماهي بايظة بايظة ...يعني انا الي هصلح الكون ...يعني انا الي قلت للبنات نعم لشراب الفيليه لا لشراب المحجبات ...ياعم بلا قراية بلا دين بلا كتب بلا فهم ...ساعات التفاهة بتيجي في مصلحة الواحد...آلاء نادت على مروة وحودة وقالتلهم يا جماعة انا والله زيكو مخنوقة من التهاب اكباد اهالينا و لعلمك يا مروة اسالي اي صيدلي او دكتور هيقولك الدوالي بتيجي من الوقفة الكتيرة مش من شراب المحجبات ده كمان لو بفرض حد عنده دوالي الدكتور بيقولوا البس شراب الدوالي الي هوا بالمناسبة ضيق ومش شفاف ...
حودة ومروة سكتوا وما ردوش ...ومشوا ....
آلاء بتدور كده لقت زميلها مينا بيقول الكنيسة مضطهدة والقبط مش عارفين يعيشوا في البلد ...ومش لاقيين فرص عمل ...وانتوا...خربتوها وماحدش حامينا ...
آلاء بصتله كده وسالت نفسها اومال انت قاعد جنبي في الشغل بتعمل ايه ...حيرتني يا مينا...
آلاء في شغلها شافت العجب ..لقت ناس بترتشي وتدفع فلوس وتقلك هدية يا باشا ...مشي حالك ..الناس كلها كده ويعني انت الي هتغير عشان تعيش وعيالك يعيشو ...
ناس بتضرب في بعض ...وتفتن على بعض ...ناس تلبس حلو ...وتقولك البلد ومصلحة البلد ...وهيا الي بتدفع فلوس عشان تمشي بضاعة ...على حساب تانية ...والي بياخد يمشي البضاعة ...عشان الزبون عايز كده ...وانا عايز كده والناس كلها كده...
آلاء بتشتغل في وسط الناس دي آلاء بتشتغل عشان تاكل لقمة كويسة ...
آلاء بتسمع من الكل ...تتكلم ساعات كتير ..ساعات تسكت كتير ....ساعات يجيلها احباط...
بتشتغل في جو ...فيه حاجات غلط كتير ....ساعات بتتاثر بس بتجاهد نفسها ...
آلاء بتحاول تكون شريفة في وسط جو فاسد ..وساعات بيكون وجودها في الجو الفاسد اصلح من بعدها عنه ...
آلاء زمايلها المحترمين زيها فاهمين وعارفين انها كويسة وبيحاولوا يؤازروها ...ساعات بتاخد موقف قيادي عشان مصلحة الشغل الي مش هيكون فيها حرام ولا مذلة ...عشان دورها وضميرها بيقولولها كده ...
آلاء ممكن تترقى في شغلها ..في ظل منظومة فاسدة ...عشان توصل كلمة حق ...ممكن ما كانتش عارفة توصلها لو ما كانتش بتشتغل
آلاء ...الشرفاء والكويسين الي زيها يعرفوا يميزوها من وسط الف واحدة ...عشان هما بيفكروا وبيفهموا وبيحاولوا يفهموا..
نشرت بتاريخ
6 February 2011
ليست هناك تعليقات:
إرسال تعليق