بولولؤ بولو لؤ بولو لؤ
....
بوق بوق بوق بوق ....
مواعييين كتير ... ....كوباية هبلة واقفة في نص الحوض تبصلك بعناد أهبل ...مليانة تفل شاي أسود حبر من بتاع التموين .....
مج أحمر من اياه عليه وش بيضحك لك أو عليك ...ورافعلك حاجبه ويغمزلك غمزة كلها سخرية بتقولك (اضحك ياه _بضم البق) .....مج ابن عمه أحمر برضه زانق أخوه الي بيضحك ....مكشر عن أنيابه ....ويوزغورلك زغرة (اكتم ياه _بتشديد الكاف وبرضه بضم البق .....
مج تالت من بني الخالة أحول ما تعرفش هوا باصصلك ولا أحول وبيستهبل فيها ومش باصصلك وهوا أصلا عايز يبصلك.....والأحول طافح بقايا نسكافيه ...والسكر تحت في قعره قاعد يندب حظه على حبسته ...حاول ساعة ما كان على البق يزحف لغاية وش المج يمكن يشوف الي عمره ما شافه اتفرق السكر حبه راح لمصير مجهول عبر مجموعة أعضاء تكون الجهاز الهضمي لكائن اسمه انسان في معدة عمال تاكل في بعضيها ...وقولون يشتغل خناق في بعضيها من ازدحام معدته بالنسكافيه على البطاطس المقليه على المسبك...يقوم الانسان ده...يبرطم في كل البني آدمين الي حواليه ...كانوا قاعدين بيتفرجوا ع التلفزيون ...منسجمين وبيفكروا سوا يمكن يلاقوا حاجة تجمعهم ....يضحكوا شويا ...يجي بسلامته أبو قولون ...الحقوني قولونييييي....آه يا قولوني ...آآآآآآآه .....واحد من الي قاعدين يقوله طب بطل الأكل الي بيهيجهولك ...يرد عليه يقولوا ما أقدرش ....واحد تاني يقولوا طب بس ابتدي تدريجيا وحاول ....يرد عليه بضيق...بقلك ما أعرفشششش ....واحد تالت ...يقوله طب استنى أعملك نعناع يهديك قولونك ....يرد عليه بغضب ما بطقش ريحة النعناع ....آآآآآآآه قولونييييي ....الحقوووووني .....حد يجيبلي دوااااا.....التلاتة قاموا يجروا ...واحد اتصل بالصيدلية يسأل ع الدوا ماردتش ...التاني قال أنا نازل أجيبوا ....التالت قال ...خد الفلوس ....آآآآآه قولووووني الحقونيييييي....أنتوا لسه ما جبتوش الدوا ...انت بتتكلم في التليفون ...وأنت قاعد لسه بتلبس ...وأنت قاعد في البيت ليييه ....أنتو عايزيني تموتوني ....قولونيييييييييي آآآآآآآه....كله يتكهرب ....عاااااااااا ....زعيق ...طخ ....عاااااا ....زعيق ....أقفل الباب ...اتق شره ....وأنت انزل هات البلابيع ....وانت اتفرج الهيه بالتلفزيون عبال ما تيجي البلابيع ....قولونييييييييي....آآآآآه ....(الي بيلهيه بالتلفزيون ....قولونه بدأيهيج هوا كمان من زعيقه ...اتنفخ قولونه ولا كأنه حامل في 3 توائم ...آآآآه) ...سكت المتأوه الأولاني ...وقال للي بيلهيه ...مالك أنت كمان بتتأوه ليه ....قالوا الله شكلي أنا كمان قولوني هاج ....آآآآآآه يا قولوني ....وفي لحظة تأمل غير اعتيادية ...ينظر كبير (القولونيين المزيف ) ...الى صغيره ...ويقوله ياحبيبي معلش روق كده الدوا زمانه جاي وهنبلبع احنا الاتنين البلابيع ونخف سوا ....آه آه آآآآآآه يا قولوني ....- المفتاح يعانق الطبلة يصدر أزيزا خافتا منذرا بعاصفة قولونية هوجاء من خلف الابواب - ....آآآآآآآآآآآه (من كبير القولونيين ) ...آآآآآآآآآآآآآه ( من صغير القولنييييين ) .....ثم تصدر آآآآآآه من المنحبس في غرفته ...( صغير قولوني آخر ) .....يبلبعوا البلابيع جميعا ....يهدأوا ....يتلموا ع التلفزيون تاني يسمعوا واحد يقول ...اذا أردتم العيش بكرامة فهذا لم يعد زمن أدوية معالجة الأعراض الجانبية ....عليكم بعلاج أنفسكم أولا من المسبب الرئيسي للمرض ...امتنعوا عن مهيجات القولون تصح أجسادكم ...وحدها الارادة تكفي....
حبات السكر الي في قعر المج الأحمر الأحول المستهبل فيها ...تهاتي آآآآآه يا حبيباتي ....
يجي الانسان من أودة التلفزيون ع الحوض ...يفتح الحنفية ....
...يغرق الحوض بالماية ...الحق ...الطوفان جااااااااااي
بولو لؤ بولو لؤ بولولؤ
.....نضافة
كركبة اترتبت ...
الحوض أصبح أكثر اشراقا من ذي قبل ....
نشرت بتاريخ
27 May 2011
ليست هناك تعليقات:
إرسال تعليق