بكرة عدا سنة على ثورة
طاه ...
نازل بكرة ولا لا؟
طاه قاعد ولا لا؟
طاه .....ممكن انا وانت يا مصري نعمل هدنة مع بعض
يا اخويا يا مصري لو انت قاعد في بيتك وخايف احب اقولك ما تخافش على رزقك ولا رزق عيالك عارفة احساسك كاب واحساسك كام
انك نفسك تربي عيالك وتدخلهم احسن مدرسة وتعلمهم كل اللغات وتكبرهم وتعيشهم احسن من العيشة الي انت عشتها
بصراحة عندك حق انك تعيش ولادك عيشة كويسة هما مالهم ومال السياسة والضرب ولا عسكر يحكم ولا شوية ثوار يعملوا مظاهرة
وخلاص وناس تموت ودم يسيل عارفة انك زيي ما تحبش الدم ولا تتمنى الموت لحد لانك زي ما بتفكر في ولادك وتخاف على دمهم اكيد مش هتحب ده يحصل لغيرك
....بس اقولك على حاجة
انت يا مصري ياللي قاعد في بيتك ومتعصب وخايف على رزق عيالك وقاعد بتلعن في الثورة والثوار وعمال تلعن في الي عامل فيها بطل وبيتظاهر وبتستخف بالي نزلوا سواء كانواشباب زي الفل وعينهم راحت او بنات واتسحلوا لو حتى شيوخ وماتوا ....
لو فكرت لدقيقة بدماغ الناس دي هتكتشف انهم زيك نفسهم في استقرار عارف هما ثاروا ليه عشان هما نفسهم يعيشوا احسن عيشة ويلبسوا لبس نضيف ويتفسحوا ويتعلموا لغات ويشتغلوا شغلانة كويسة ومايتبهدلوش في مواصلات عايزين يتجوزوا برضوا زيك ويبقى عندهم عيال زي عيالك ويخافوا عليهم زي مانت بتخاف على عيالك
عايزين بلد مستقرة بس هما مخهم غير مخك يمكن انت تقلت شوية لانك بتفكر لنفسك ولعيالك
وبتحسب كل خطوة قبل ما تقرر وقبل ما تتحرك وهما لا الثوار -ومش كلهم-برضه بيفكروا بس لنفسهم ولغيرهم-عيالهم الي جاية في المستقبل- بس هما اخف منك وما فيش حاجة تضرهم زيك انت لو رحت ماحدش هيوكل ضناك غير عناية ربنا هما لو راحوا اهاليهم بس الي هتعيط عليهم
فهمت الفرق في ايه
انزل لعقلية الناس المخالفة ليك
او اطلعلهم ما تعرفش يمكن الاختلاف ده صحة
ويمكن الناس دي بصوتها العالي -مش الصريخ الغوغائي-تقدر تغير الي انت ما عرفتش تغيره يمكن الناس دي بصوتها واصرارها تقدر تبني لولادك المستقب الي انت بتحلم بيه
آه سامعاك بتقولها اهو
وهو الناس الي نازلة دي اصلا متوحدة
هقولك لا
هتقولي يبقى هتبقى فوضى ونار ودم تاني ومش هنخلص يبقى ماهمش لازمة
هقلك اصبر مافيش تغيير بيجي مرة واحدة
اه مش كل الي نازلين كويسين وبيفهموا بس منهم بيحب بجد البلد ونفسة تطور وعارف ان صوته هياثر
وماعندوش مانع دمه يروح عشان البلد كده كده في دم راح وان شاء الله ربنا يسترها -الا لو كالعادة اللهو الخفي الي كل مرة ماحدش بيعرف يمسكوا وبس بيتمسك ناس عادية ويتحاكموا محاكمة عسكرية_
هقولك الدم ده سال وربنا عالم بنية صاحبه في ناس ماتت بجد لانها بتحب البلد وناس اندست في النص تسرق واتقتلت فحسابها عند ربنا وناس منافقة ملهاش هية واضحة
ماتت برضة
الي هنتفق عليه ان الاغلبية مش الكل دم طاهر لناس محترمة زي وزيك
ماتوا عشان هما مؤمنين بقضية البلد وعايزين يعيشوا بني آدمين
ولو دم تاني سال ما تستغربش في دول ثوراتها كانت بدموية اكتر من كده احنا بالمقارنة بالدول التاني ثورتنا سلمية وتعتبر بيضا شوية
مش بتفه من قيمة الدم بس بحسبها بالورقة والقلم وبالنسبة والتناسب
فكر انك قاعد وغيرك بيجيبلك حقك وحق عيالك في المستقبل وبيوفر عليك المجهود
هتقولي دي مؤامرة والناس عايزة تمشي الجيش عشان تبقى فوضى وهما الي حمونا وهما وهما
هقولك كده كده اي تغيير لازم يحصل فيه اضطراب وفوضىده طبيعي والجيش على راسنا لما حمانا
ووقف جنبنا الجيش اصلا عبارة عن المهندس والدكتور والمحاسب وكل الشعب سلفي واخوان ومسيحي ابني وابنك
بس الجيش قال كلام ورجع فيه وضرب ناس برضه وحاكم ناس عادية زي وزيك محاكمة عسكرسة وسايب الي اخد حقوق الناس بيتحاكم مدنيا
الجيش سحل بنات وضرب وطبعا مش كل الجيش -ارفض التعميم- الجيش عمل عملة مستنكرة سحل وضرب واكرر مش كل الجيش طبعا
ونخش في حكاية البنات والفوتو شوب و6 ابريل بيشربوا خمر وبيرقصوا وادربوا في افغانستان مع طالبان ...
هقولك يا سيدي فيه ناس وطنيين زاروا البنات واتاكدوا من عملية السحل ودور ع النت وهتعرف الحقيقة والشخصيات عامة ولها وزنها
وهقولك ارفض المشهد من باب النخوة وباب رفضك للظلم م انت مع راي بقاء الجيش ياسيدي يفضل بس ارفض اللااخلاق : لانه ممكن تدور عليك الدواير ويحصل في اختك زي الي حصل للبنات دي وياسيدي هتقولي منظمات حقوق الانسان ودي مؤامرة خارجية وعايزين يلوثوا سمعة البلد ويتدخلوا هقولك هل كل المنظمات فجاة عايزة تعملنا اجندة خارجية ما تعقلش قولي منظمة اتنين مش كلهم
ده موقف لو سيدنا النبي او عيس عليه السلام او حتى موسى شافوا كان رفضه في مجتمعه
هتقولي دي عاهرة
او مشيها بطال
هقولك حتى لو حشاشة دينا بيقول نشد الستات او حتى الرجالة
ونهين كرامة بني آدم
ياسيدي انت ايش عرفك بيها وبدينها افتكر حادثة الافك لما ستنا عيشة اتهمت بشرفها والمجتمع كله وقف ضدها واتبرات بالقرآن
وستنا مريم اتهمت بالفاحشة وهي مخلفة نبي معجزة بدون اب
عارفة انك مستنكر استغلال الحدث وان في ناس بتلعب في الماية العكرة معاك في ده بس ما ينفعش نشوف منكر وما ننكروش
هتقلي 6 ابريل وعفيفي والجن الازرق عايزين ياخدو مصر لصالح اوروبا البلد هقولك
يعني مين دول اساسا وهل كل مظاهرة هما الي بيعملوها معلش انت كده مديهم اكتر من حجمهم الطبيعي
هما مجموعة شباب
منهم لسانهم طويل وبيشتموا ومنهم ناس كويسة برضه
عايز تعرف اصولهم دور عليهم في الشوارع وانضم ليهم وهاتلنا اثبات انهم بجلالة قدرهم هما الي هيهدوا مصر
يا سيدي البلد دي مش بتاعة لا 6 ولا 7 ابريل حتى البلد دي بتاعتنا كلنا وفيه ناس غيرهم بينزلوا عشان نفس القضية
طااه ايه كمان
الي نازل مش كلهم عل راي واحد وهيتخانقوا
طيب تعالى نشوف
فيه ناس هتحتفل
حقهم الناس دي شايفة ان الثورة عملت حاجة ان انتخابات مجلس الشعب نزيهة والشعب قال كلمته-على الرغم من المخالفات الي قامت بيها بعض الاحزاب يوم الصمت الانتخابيبس ما علينا-
وان الاخوان والسلف -الي فيه ناس مش عايزاهم وما بتحبهمش-
الي الشعب جابهم هما الي اختارهم -متفق معاهم اولا- وهو الي عايزهم بتوجيه بقى ديني او عدم توجيه اهو ده الي حصل لازم لو احنا بلد هتبقى ديمقراطي نتقبل فرحة الناس دي من وجهة نظرهم هما شايفينها نجاح ثورة يبقى نجاح
طيب والناس الي نازلة تتظاهر
وشايفين ان الثورة لسة ما نجحتش حقهم برضه هما شايفين انكل حسني بيدافع عنه وانكل فريد الديب بيقول هو الي قائد الثورة
وشايفين دم سال وناس ماتت وماحدش خد حقه وشايفين تباطء -وجهة نظر- يبقى حقهم ينزلوا يتظاهروا
طب ينفع الاتنين ينزلوا مع بعض ويحترموا بعض آه ينفع
طب ينفع الي بيشجع العسكر ينزل آه ينفع ماهو مش عدونا
طب ينفع الي مربي دقنه ينزل ؟
طبعا هوا بت البطة السودا
طب ينفع المسيحي ينزل آه هما مش ماتلوهم ناس برضوا ولا ايه
ينفع كلنا ننزل ونحترم بعض
؟!!!
ينفع ما نتعصبش على بعض
ينفع اللهو الخفي بكرة يعمل عمايلوا؟آه هوا جت عليه بس ينفع نكون كلنا أذكى من اللهو الخفي ونحاول نمسكه .....
امسسسسسسسسسسسسسسسسك لهو خفييييييييييييييييييييييي
طاه
اقولك على حاجة
انا نويت والنية لله
افطر بره مع صحابي واعدي على الي بيحتفلوا واهيص معاهم وروح مع الي بيتظاهروا اشارك معاهم
واروح بيتنا اقعد مع امي واتفرج على الشارع في التلفزيون
ونويت لو اي لهو خفي جالي من اليمين او الشمال هديلوا باقوى سلاح ربنا رزقني بيه
جزمتيييييي
وكل ثورة وانتم بخير
نشرت بتاريخ
24 January 2012
ليست هناك تعليقات:
إرسال تعليق