نفيسة محمدين ام شنب ....البنت بتهته وبتفتف بالكلام واحيانا شفتها السفلى بتدلع ناحية اليمين لما بتتعاكس وبتتعوج ناحية الشمال لما بتتخض ...عندها حسنة جنب حاجبها الشمال ...الحاجب الايمن يرتفع عشرة سنتيمتر مربع عن الحاجب الايسر مناخيرها تتصدر وشها الي بيتنفخ او بيفضى حسب الحالة المزاجية ...عينيها خضرا بتنور في الضلمة وبطفي في النور زي القطة المشمشية الجدعاء متغيبة عن بيتها من يوم 3-3-2011...لمن يجدها سليمة لازم يتاكد انها بتهته ولو متشرطة وبلطجي شال الحسنة الي جنب حاجبها الشمال ...يدور وهيلاقي حسنة تانية البلطجي ما شفهاش في مناخيرها من ناحية اليمين ....ولو البلطجي شوه جثتها وبفرض انك لا قدر الله لقيتها ومش عارف هي نفيسة ولا لا دوس بس بشويش على تفاحة آدم (المستخبية عندها ) هتلاقي الجثة بترعش 5 رعشات بالعدد...لمن يجدها برجاء الاتصال بالرقم 0101010101...ولو التليفون كان مغلق او غير متاح يتصل على 0121212121 ولو حد رد عليه وقالوا انا ما عرفش واحدة اسمها نفيسة ...اشتمه وقلوا نعم يا ابو نفيسة لو كان صوت المتحدث راجل او نعم يا ام نفيسة لو كان الصوت ست اما لو الي رد عليك طفل واستهبل عليك قلو ماما نفيسة جايبالك دوريتوس بالجبنة أن أن آآآه هتلاقيه ان شاء الله هيتعاون معاك وهيقلك ماما نفيسة هيييييييييه اقابلك امتى عشان استلم دوريتوس ...ممم قصدي ماما نفيسة ...
انشرها ولك الاجر
ليا قريبة قالت انها لقيت صورة لواحدة صاحبتها معاها في الكلية عارفاها كويس قوي ومكتوب انها مفقودة ومحطوط رقم تليفون لمن يجدها والبنت لا مفقودة ولا يحزنون وكانت زي القردة حية ترزق والحمدلله
...
من يومين كنت في شغلي قابلت دكتور وعرفته باحد ادوية شركتي وانا بكلمه سمعنا ضرب نار وكان قريب جدا ...الدكتور وشه كان زي الليمونة وقالي دي خامس طلقة ...طخخخخ دي سادس طلقة ...قالي يا بنتي قومي روحي كفاية شغل
قلتله اهداكده يا دكتور عادي ده احتفال بالثورة انت مخضوض كده ليه ...سيبته ورحت لدكتورة تانية ..في نفس ذات المستشفى ...استنيت اما الممرضة صديقتي تدخلني ليها ...قوم ايه الاقي ست غلبانة لافحة عيل على كتفها ...بتقولها الله بقى ما ادخليني يا هدى ...راحت هدى قالتلها ...يعني انا الي مش عايزة ادخلك دي الدكتورة معاها واحدة ابنها عيان وبتكلمها في التليفون ومش عارفة تيجي عشان في ضرب نار في كفر عبده ...اختكو سالت صديقتها هدى ...ايه يا هدى ده صحيح فيه ضرب نار ...هدى ابتسمت ابتسامة خبيثة صفراء فاقع لونها تسر الناظرين وقالتلي ...لا يا دوكتورة ده انا بس بقلها كده عشان تسكت وما تزنش على نافوخي ما فيش ضرب نار ولا حاجة ...
....دخلت لدكتورة تالتة لاقيتها لازقة في كرسيها ومنكمشة على نفسها زي الكتكوت لما يبقى سقعان كده
الست قالتلي انت ايه الي جيبك ...قلتها اكل العيش يا دكتورة قالتلي لالا روحي ...واطلعي من الشوارع الرئيسية بلاش جانبي امشي في النور ...
وانتقلت موجات الخوف المتذبذبة من الدكتورة وبتاثير الفضا الي في المستشفى على غير العادة والصمت المفخخ رحت جري على عربيتي والتقوى كلها نزلت عليا الاستعاذات والادعية الله ينور والعينين مبرقة لكل الناس في الشارع ...استعدادا لاي مغامرة اختم بيها اليوم ...مديت الاقيلك الناس ماشية عادي في الشارع ...والحياة عادية ...آه هما كمشانين من البرد ومستخبيين في بلاطيهم ...واكيد سمعوا طلق والعاب نارية بس لا حد بيجري ولا فيه ولية بتصوت...
....وصلت بيتنا بالسلامة وانا بحمد ربنا على نعمة الحياة
....
فكرت كده لدقايق ...حوادث ...ناس مفقودة ...واحد سواق تاكسي اتدبح ...واحدة اتثبتت ...ايه ده
رجعت كده بذاكرتي كام شهر فاتو قبل 25 يناير ...وافتكرت اني اتسرق مني موبايل غالي وسط زحمة ستات في الترام وكان فيه كومسري وكان فيه امن ورحت عملت محضر في القسم وهأو أو طبعا الموبايل رجع ...
قبل 25 يناير كان بيتسرق مني ومن ناس كتيرة فلوس من غير ما حس كنت بتثبت معنويا قلي ازاي ..؟ولو سمحت اتعجب وانت بتسال ...عشان احس بفهمي العميق ...وانا بجاوب .....حضرتك لما تروح اي مصلحة حكومية بتتذل وتطلع روحك بدون ما تطلع عليك اي مطوى ...بس سنج الموظفين الابتزازية ...تخليك تفضي جيبك عشان تطلع ورقة انت اصلا محتاجها عشان تعيش في البلد دي ...
تتكلبش مرة وانت راكن في شارع مافيهوش اي علامة تدل انك واقف في الممنوع تروح تدفع ...وتفاجيء ان تمن المخالفة يختلف من مكان لآخر ...اخدلي بالك وتدفعها لشرطي مرور تصب في جيب الداخلية ...عشان يتعمل بيها جاكوزي لجل وزير الداخلية يهدا بعد ما تعب يا عيني في جمع فلوس المخالفات ...
قبل 25 يناير كان فيه ناس بتتقتل ظلم والقاتل عادي ولا كانه عمل حاجة ويتاخد غيره ظلم هيا دي مش بلطجة برضه ولا ايه
قبل 25 يناير ...كان فيه بنات بتتعاكس وتتخطف برضه وستات بتتقتل واجوازتها تكتئب ادام الاقاريب وتسجد سجدة شكر على نعمة فناء الزوجات النكديات ...
كان في اطفال شوارع بالهبل ...
كان فيه مخدرات ...وحبوب هلوسة من بتوع اخونا القذافي ...
....لو حسبتها كده نسبة وتناسب هتكتشف ان الحوادث قبل 25 يناير هي اكتر بكتير من بعد 25 يناير
قبل 25 احساسك ان فيه جهاز بيحميك واهو ظل شرطي ولا ظل حيطة ...والحوادث الي بتسمعها وبتقراها في الجرايد وتستعجب من بشاعتها ...بس دي في الجرايد والتلفزيون ...بعد 25 يناير الحوادث موجودة ماحدش يقدر ينكرها ...بس في فراغ امني واحساسك ان ما فيش لا ظل شرطي ولا ظل حيطة وانك انت ظل نفسك ...دي الي مخلينا كلنا نخاف اضف الى هذا ...الحادثة لما تتحاكالك بشوية تحابيش وشوية توابل كده مع شهقة من ستات البيوت ونبرة اسى من زميل ليك ...وصورة على النت ورسالة ع الموبايل لواحد رجله مسلوخه مفقود ...ده هيخليك تعتقد ان القيامة قامت وان مسيح الدجال خلاص جاي ...
طب العمل ايه يا جدعان ؟
نبطل نشتغل ...نبطل نعيش ...نذبهل ...ونعد نولول ...ننكمش في بيوتنا ...
نسيب البلد فاضية ونعتصم اعتصام سلمي في البيت ...يا سلام ده احنا كده هنوفر على جهاز امن الدولة هيعتقلوا الشعب الي معتصم في بيته والي بيكتب على الفيس بوك وينفس عن نفسه ..
قوم يلا انزل اتمشى في الشارع ...اشتري حاجتك ...اركب مواصلات ..اتبهدل ..ايه يعني ايه الي هيجرالك ...بس رجاء خاص ما ترميش نفسك للتهلكة ...انزل في الزحمة بلاش الحتت الساكتة ولو اضطريت تخش شارع ساكت سلح نفسك ببرتقالة تحشرها في بق اي بلطجي هيموت من الاختناق في الحال ...ولو ثبتك زغزغة في كرشه واديلو كتف ع السريع
لو هتركب عربية وحد اعترض طريقك ببيض او حتى شوكولاتة جالاكسي ما تقفش امشي كام متر كده واقف وانزل الحس الشوكولا وتبقى نضفت العربية ...
وتحذير هام لاخواتي البنات الحلوين ...خدي معاك خلطة الدفاع عن النفس السحرية ...الي بتتكون من تلت جرام خل ونص جرام شطة ورشة فلفل اسود مطحون او حصى لزوم الرشق السريع ...
وللفتيات الفاتنات الي مش قادرين ونفسيتهم تعبت من البيت وهيموتوا ويروحوا السينما او يشربوا لاتيه مع بيسو ...ارجوكي حاولي تيجي على نفسك وبلاش سليم ليج ...بلاش بدي هيفرقع او مخروم نتيجة مسمار عديتي عليه وانت في طريقك للكافيه ...وبليز بلاش 10 كيلو بودرة مضغوطة او مائية ...ممكن كيلو واحد يفي بالغرض ...ومشيها كحل كفاية ...ويلا ليب جلوس لونه شفايفي ...
والدهب نقلل شوية البساطة حلوة وموضة الايام دي ..تلاتة بالله العظيم انتي اصلا قمر ومالكيش حل وجامدة آخر 10 تلاف حاجة ...بس ما تستفزيش البلطجي وتجيبيه لغاية عندك وبعد كده نسمعك بتصوتي اوه ماي جاد بلتجييييييييييي
.انزل من بيتك توكل على ربك حصن نفسك قول دعاء الخروج من البيت لو كنت مسلم و لو كنت مسيحي شوف دينك بيطمنك ازاي ...اسمع اخبار بس اتاكد انها مش اشاعات وما تقلقش سيبها على الله وخد بالاسباب
خلي عندك يقين انك عايش لهدف في الدنيا دي وان ليك رب خالقك وهوا الي حافظك وهو الي بيحرسك وهو الي هيقبض روحك وقت ما هو عايز ...
خلي عندك يقين ان لحظة موتك هتيجي هتيجي بس خليها تيجي وانت كريم عزيز رافع راسك لفوق بتحاول تصلح من نفسك و بانك عايش في بلد تتشرف بيك لان حضرتك في يوم من الايام دافعت عنها وعن كرامتها لان كرامتها من كرامة نفسك ...
14 March 2011
ليست هناك تعليقات:
إرسال تعليق