رجالة آه وثورة آه ولجان شعبية آه ورقصني يا جدع مع البلطجية ده أنا جدع قووووي واقدر اقطع عرق واسيح دم
طبعا لا شوفنا لا لجان ولا ثورجية ولا يحزنون ....الرجولة بتعيط يا رجالة ...
قصيره...
المصريين هما الي كان بيحموا نفسهم بنفسهم وهما الي بيشخطوا في اي حد بيروج ويوزع ورق من الي حضرتك قد يكون وقعوا في ايدك يوم الانتخابات اخدلي بالك ...يوم الصمت الدعائي الانتخابي ...يعني ممنوع توزع او تنادي بالميكرفون او تتكلم عن حزبك ...عدوها
اللاب توب جنب اللجنة وبناء على احد الشهود الموثوق بهم كهربة اللاب من المدرسة اي فيها اللجنة الانتخابية ....(الطم)....
ما علينا...
طب دول وعرفناهم احزاب وليها اغراض معينة ....
طب الناس هيا كمان ليها أغرض...
طنط وبنتها وانا داخلة قالولي طبعا هتكتبي (كيت وكيت) قولتلهم وليه طبعا ...قالولي ده المضمون...على أساس اني باكل قطايف بالجبنة وبمسح بقي بطرف الطرحة ولسة بريل ....صبرني يارب ...
ليه دايما فيه فرض راي من كل جهة وخلاص ...يعني ...تلاقي اخوان ...صوتوا للحرية
نور ...معا على طريق النور وسيبكو من الليبرالين والعلمانيين هيخلونا نعبد الجاموسة ام حسنة بمبي...
كتلة ...مع بعض وسيبكو من الاخوان هيضيعونا
الثورة ..لو ماكنتش بتتظاهر يبقى انت مش ظاهر...
وتلاقي الكلام ده بيحصلك طول مانت عايش
يادي النصيبة الزفتة السودة ...آه زفتة ومهببة وسودة -عندك اعتراض- ولا دي كمان هتخليك تلعب سودوكو مع الشعب
الحقيقة مش من حق حد يفرض رايه على اي حد ما دام لا يتعارض مع اخلاق ..دين (اقصد الاهانة والتجريح والسب والقذف في اي اصل من اصول الدين ولو على غير دينك)...عرف وتقاليد البلد...
مع احترامي لليبرالي انت ايه الي مزعلك لو سلفي مسك او اخوان او بوذي او رقاصة تابت لربنا ...
ومع احترامي للسلفي انت ايه الي ينقص من دينك لو ليبرالي انتخبت وليه نضرب اسافين من هنا وهنا
ومع احترامي للاخواني انت ايه الي حبك في السلطة لدرجة انك معاهم معاهم عليهم عليهم
ومع احترامي للعلماني انت ايه الي حازز في نفسك لو واحدة محجبة وعايزة تنزل البحر بس مش ببكيني هيا مش من حقها برضة ولا هيا قردة بتاكل بونبون سيما
ومع احترامي للانسان الي يموت ويفرض رايه على اخوه الانسان هوا مش ربنا خالقه زيك عنده مخ وبيفكر ...ولا هو لازم تاكل تايجر اكبر وسيطر....
الحقيقة انك انسان ولك حرية الاختيار كما ان لك حرية عرض افكارك بس بدون ما تفرض رايك
اعرض بحيادية لو خايف على دينك او توجه معين قول بس بدون ما تظلم يعني قول الحقيقة من جهتيها وسيب للي قدامك هوا يختار الموضوع مش هيقلل من قيمتك بالعكس
....نيجي بقى لموضوع اللجان والمهازل الي الواحد شافها وممكن يتفادها ويساعد غيروا على ذلك اليكم القترحات الآتية:
1) تقدر تعمل لوحة اعلانية وي الي هتشوفها في الصورة بتكاليف بسيطة مش هتكلفك انت انت و6 من صحابك غير 30 جنيه يعني كل واحد يدفع 5 جنيه مش خسارة في البلد ...وزي ما غيرك بيحاولوا يشتري الاصوات ...انت فهم الناس الي بيبيعوا اصواتهم باللوحة دي انه بني آدم ليه كرامة وماحدش يدفع فيه قرش مليم ده لو هوا عنده كرامة من الاساس بدون كلام باللوحة
2) تقدر تجمع الورق الي بيتوزع من مروجوا حملاتهم الاعلانية وتعمل بيها لوحة تانية ليك تعبر فيها عن رفضك لاستغلالهم يوم لحملاتهم
3) ودي الورق ده لحماة اللجنة من الجيش واقنعهم بهدوء انهم يساعدوك في منع الورق ده جنب اللجنة ...حتى لو ما تحكروش اطلب منهم انهم ما يمنعكش انت من التحرك
4) تقدر بصوت منغم مسرسع او اجش تعمل موسيقى تصويرية وهتلاقي جارك الي واقف جنبك في الطابور ما هيصدق وهيساندك لتطفيش اي محاولة للسيطرة علىيك او على غيرك - حصلت والله وبتجيب نتيجة-
5) ممكن هتلاقي واحد بلطجي بس من تحت بير السلم هيجي جاي يقولك -ابلةةةةة هوا ايه اللوحة دي فيها ايه- هتشرحلوا ولو سالك طب هتنتخب مين قولوا وانتا مالك وهتلاقي حبة ولايا زي الفل بيآزروك وبينفخوا نيران الغضب الانثوية مما سيودي بحياة البلطجي في عدة ثواني
6) تقدر تكتب على النت وتضيف افكار لفكرتي هنا ومعا لمكافحة الصويت في الانتخابات
7) تقدر انت وصحابك تعملوا لجنة شعبية مصغرة لو رجالة البلد طفشت عادي سبراي هيادي الغرض
المهم انت تقدر تعمل حاجات كتير لانك مصري وابوك مصري وتيتك ان شاء الله برضه مصرية ...البلد دي بتاعتنا كلنا فماحدش ليه حق فيها لواحده خليك ايجابي
وممكن تقول هيا كده كده بايظة ...هقوله لا لسه ما بظتش انتا الي هتصلحها للاجيال الجاية بس انت اعقدها وتوكل ولا تياس من روح الله فنحن خير اجناد الارض ونحن في رباط الى قيام الساعة الى .....
ملحوظة: كاتبة هذه الكلمات كانت بتاكل تايجر اكبر وسيطر ووجدت انه لا فائدة منه وقررت تحول لترو شيبس قول الحق الحق ما يزعلش حق والله المستعان على ما تصفون
نشرت بتاريخ
28 November 2011
ليست هناك تعليقات:
إرسال تعليق